పరమాచార్య అనుగ్రహం

1993లో నా షష్టిపూర్తి చెన్నైలో చాలా నిరాడంబరంగా జరిగింది. ఆ ఉత్సవం తరువాత నేను నా భార్య కలిసి పరమాచార్య స్వామివారి ఆశీస్సుల కోసం కంచికి వెళ్ళాము.

స్వామివారు మమ్మల్ని అనుగ్రహించి మాకు కుంచితపాదాన్ని అనుగ్రహించారు. చిదంబరంలో నటరాజ స్వామి ఆనంద తాండవం చేస్తూ ఉంటాడు. నటరాజ స్వామి కుడికాలు పీఠంపై బోర్లా పడుకునిఉన్న ఒక రాక్షసునిపై ఉంటుంది. పైకెత్తిన ఎడమకాలుకు కుంచితపాదం(వివిధ ఔషధ మొక్కల వేర్లతో చేయబడిన ఒక చిన్న మాల వంటిది) ఉంటుంది.

ఈ విశ్వం యొక్క సుక్ష్మ స్థూల పదార్థముల యొక్క సృష్టి, స్థితి లయ అను చక్రభ్రమణానికి సాక్షిభూతంగా చిరునవ్వుతో గమనిస్తున్న భగవంతుడి లీలా రూపమే ఈ చిదంబర నటరాజ మూర్తి. ఆ రాక్షసుని పేరు అపస్మారకుడు, సంసారంలో పడి జీవుని గురించి మరచి దేహం గురించిన ఆలోచనలు చేసేవాడు.

అ కుంచితపాదాన్ని నా పూజామందిరంలో ఉంచాను. దేహాత్మ సంబంధాలను, ముడులను సడలించి, నా సందేహాలు తీరి మహాస్వామివారి అపార కరుణచేత ఆత్మదర్శనం కలగాలని, జన్మజన్మల జననమరణ చక్రం నుండి విడివడాలని ఆ యంత్రాన్ని(కుంచితపాదం) రోజూ ప్రార్థిస్తున్నాను.

1994 జనవరిలో పరమాచార్య స్వామివారు మహాసమాధి చెందే కొన్నిరోజుల ముందు ఒక స్వప్నం వచ్చింది. చాలామంది భక్తులు గుమిగూడి ఉన్నారు. దర్శనం కోసం దూరం నుండి నావైపు తిరిగి చూస్తారేమో అని తొంగిచూస్తున్నాను. కొద్దిసేపటి తరువాత మహాస్వామివారు నావైపు తిరిగి చెయ్యెత్తి నన్ను చూశారు. క్షణకాలంలో స్వప్నం కరిగిపోయింది.

అప్పుడు ఉషోదయ కాలం. ఏమి అర్థం కాక ఆదరాబాదరగా లేచాను. అది వారి నిష్క్రమణకు సంకేతం అని తెలియలేదు. మూడు నాలుగు రోజుల తరువాత అనుకుంటూ విషయం తెలిసి సాయంత్రమే కంచికి పరిగెత్తాను. మరుసటిరోజు ఉదయం వారి గురువు గారికి అంజలి ఘటిస్తూ ఇద్దరి మధ్యలో ఉన్న పరమాచార్య స్వామివారిని దర్శించుకున్నాను. సనాతన ధర్మాన్ని బ్రతికించడానికి వచ్చిన అపర ఆదిశంకరుల కడసారి దర్శనం అది.

సశరీరంగా వారు లేకపోయినా ఆ జీవన్ముక్తులు ఎందఱో భక్తుల హృదయాలలో సజీవులై ఉన్నారు.

అరుణాచల పద్దికంలో భగవాన్ రమణులు చెప్పినట్టు అరుణాచల అని అన్న వెంటనే ముక్తి లభిస్తుంది. మన బాధలకు ఏదైనా మందు ఉంది అంటే అది అరుణాచల అను నామమే. ఎనభైఅయిదేళ్ళ ఈ వయస్సులో వారి కరుణ అనే మందు కోసం చేతులెత్తి నమస్కరిస్తున్నాను.

--- ఎం ఎస్ గోపాలకృష్ణన్, కంచి పెరివ ఫోరం.

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

కావుమన్న కాకులు

పరమాచార్య స్వామివారు అఖండ కావేరీ ప్రాంతంలో విజయయాత్ర చేస్తున్నారు. ఒకరోజు మకాం చేసిన చోటుకు దగ్గర్లో ఉన్న కొబ్బరి చెట్ల తోపులోకి వెళ్ళారు. ఆ కొబ్బరి చెట్లపై చాలా కాకులు ఉన్నాయి.

తనతో పాటు ఉన్న పిల్లవాడితో, “ఈ కాకులను కావు కావు అని అరవమని అడగనా?” అని అడిగారు. ఏమి సమాధానం చెప్పాలో ఆ పిల్లవానికి అర్థం కాలేదు.

“ఇప్పుడు చూడు” అని పరమాచార్య స్వామివారు అచ్చంగా కాకిలాగా కావు కావుమని అరిచారు. అక్కడున్న కాకులన్నీ ఒకేసారి శ్రీవారికి ప్రత్యుత్తరంగా కావుమన్నాయి.

“ఇప్పుడు కాకులు అరుస్తున్నాయి. కనుక ఈరోజు చాలామంది అతిథులు వస్తారు కాబట్టి ఎక్కువ ఆహారాన్ని వండమని వాళ్లకు చెప్పు” అని ఆదేశించారు స్వామివారు.

ఎవరూ రాకపోతే, ఎక్కువగా వండినవన్నీ వృధా అవుతాయని శిష్యులు భయపడ్డారు.

కాని ఏమి ఆశ్చర్యం! అప్పుడే తెలిసింది మకాం దగ్గరలోనే కాంగ్రెస్ పార్టీ సమావేశం ఎదో జరుగుతోంది అని. ఆ సమావేశానికి వచ్చినవాళ్ళందరూ పరమాచార్య స్వామివారు ఇక్కడే విజయం చేస్తున్నారని తెలుసుకుని స్వామివారి దర్శనానికి వచ్చారు.

పరమాచార్య స్వామివారు ప్రతి ఒక్కరిని ఆహారం సేవించి వెళ్ళమనడంతో చివరికి ఒక్క ముద్ద అన్నం కూడా మిగలలేదు.

--- శ్రీమఠం బాలు మామ, మహా పెరియవళ్ - దరిశన అనుభవంగళ్ 2

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

మహాలయపక్షం – నువ్వులు నీళ్ళు

ఇప్పుడు జరుగుతున్నది మహాలయపక్షం (25-Sep -2018 నుండి 09-Oct-2018 వరకు). దాని ప్రాశస్త్యం గురించి మహాస్వామి వారి మాటల్లో . . .

ప్రతి మానవుడు వారి పితృ దేవతలకు, దేవతలకు కృతజ్ఞతలు తెలపవలసిందే. ప్రతి ఒక్కరూ పితృదేవతలకు ఋణపడిఉంటారు. కావున వారిని పితృయజ్ఞం ద్వారా తృప్తిపరచాలి. వీటితోపాటు మనతోటి మనుష్యులకు సహాయపడాలి. కనీసం రోజూ ఒక అతిథిని ఆదరించి ఆహారం ఇవ్వాలి అది మనుష్యయజ్ఞం. వేదములు నేర్చుకుని ఆమ్నాయం చెయ్యడం, బోధించడం దేవయజ్ఞం. అందరిపలుపున దేవయజ్ఞం చెయ్యడం కొందరి పని. అందరు చెయ్యవలసినది చెయ్యగలిగినది భూతయజ్ఞం. అన్ని ప్రాణులయందు ప్రేమ, దయ కలిగిఉండటం, ఆహారం అందించడం వంటివి. పితృయజ్ఞం, మనుష్యయజ్ఞం, దేవయజ్ఞం, భూతయజ్ఞం అందరూ ఏదోఒక రకంగా చేయవలసినవే. ప్రతిఒక్కరూ వైదిక ధర్మం ప్రకారం ప్రతి కార్యాన్ని ఈశ్వరార్పణం చేసి కాలం గడిపితే అతను బ్రహ్మయజ్ఞం చేస్తున్నాట్లు. “తిరుక్కురళ్” రచించిన తమిళ కవి తిరువళ్ళువర్ కూడా అదే చెబుతారు.

“తెన్పులత్తర్, దైయివం, విరుండు, ఒక్కళ్ తన్ ఎన్రు అంగు అయింబులత్తరు ఒంబళ్ తలై”

తెన్పులత్తర్ అంటే పితృదేవతలు - తాత ముత్తాతలు. అందరూ వారి ఋణాన్ని తీర్చవలసినదే. వేదము “మాతృదేవోభవ, పితృదేవోభవ” అని చెప్తుంది. అంటే మన తల్లి తండ్రులు దైవసమానులు. వారిని ఎన్నటికి దూషించరాదు. వారు ఎంత చెడ్డవారైనప్పటికి వారిని నిందించడం పిల్లల పని కాదు. వారు ఎలాంటి వారైనా వారు తల్లితండ్రులే. వారు ఈ లోకమును వదిలి వెళ్ళిన తరువాత, తప్పకుండా వారికి వైదికముగా శ్రాద్ధ కర్మములు చేయవలెను. శ్రాద్ధ కర్మను నిరసించిన సంస్కర్తలు కూడా తల్లితండ్రులను కాపాడుకోవలెను అని ఒప్పుకున్నారు.

“మనం సమర్పించే నువ్వులు, నీళ్ళు, అన్న పిండములు, ఫలములు ఇక్కడే ఉంటాయి కదా? మనకళ్ళ ముండు చనిపోయినవారు వచ్చి ఎప్పుడు తినలేదు కదా? పునర్జన్మ సిధ్ధాంతం ప్రకారం వారు మరలా జన్మించియుంటే, వారికోసమని ఇవన్ని చెయ్యటం పిచ్చిపని” అని కొందరి వాదన.

మీకు ఒక కథ చెబుతాను.

”ఒక మోతుబరి తన కొడుకును దూరాన ఉన్న ఒక పట్నమునకు పైచదువులకై పంపించాడు. కొన్ని దినములలో ఫీజు కట్టవలనెని ఆ అబ్బాయి తన తండ్రికి టెలిగ్రాఫిక్ మనీయార్డరు ద్వారా డబ్బు పంపమని ఒక లేఖ రాసాడు.” తండ్రి కార్త కలవరపడ్డాడు. అతను టెలిగ్రాఫ్ కార్యాలయానికి వెళ్ళి గుమాస్తా గారికి డబ్బులిచ్చి టెలిగ్రాఫిక్ మనీయార్డరు ద్వారా ఆ డబ్బును తన కొడుక్కి పంపమన్నాడు. డబ్బులకి కన్నాలు చేసి అందులోకి తంతి దూర్చి దాన్ని మొత్తం వాళ్ళ అబ్బాయికి పంపుతాడు అని అనుకున్నాడు. కొద్దిసేపటి తరువాత ఆ గుమాస్తా “డబ్బు మీ అబ్బాయికి పంపబడింది. అతనికి చేరుతుంది” అని అన్నాడు. ఆ రైతు మళ్ళా కలవరపడ్డాడు. డబ్బు అక్కడ ఉన్న గల్లా పెట్టెలోనే ఉంది. డబ్బుల్ని కట్టి ముడి కూడా వెయ్యలేదు. అతను గుమాస్తా గారితో “నేను ఇచ్చిన డబ్బు ఇక్కడే ఉంది. వాటికి మీరు కన్నం కూడా చేయలేదు. మరి మా అబ్బాయికి ఎలా పంపారు?” అని అన్నాడు. గుమాస్తా అతనితో “మీ అబ్బాయికి చేరుతుంది” అని భరోసా ఇచ్చాడు. తరువాత అతను సందేశములు పంపు పనిలో మునిగిపోయాడు. ఆ పల్లెటూరి రైతు సమాధాన పడలేదు.

కాని వాళ్ళ అబ్బాయికి ఆ డబ్బు పంపబడింది.

పితృదేవతలకు పిండప్రదానము చెయ్యడం కూడా అటువంటిదే. శాస్త్ర ప్రకారం చెయ్యవలసిన క్రతువు శ్రద్ధగా చేస్తే పెట్టిన శ్రాద్ధం పితృదేవతలకు అందేటట్టు దేవతలు చేస్తారు. వారు ఆవులుగా పుట్టినట్టైతే పెట్టిన శ్రాద్ధం వారికి గడ్డి, దాణా రూపంలో అందుతుంది. పరమాత్మ ఆజ్ఞ ప్రకారం సంబంధించిన దేవతలు వారికి అందిస్తారు. కనుక చనిపోయిన తల్లికి తండ్రికి పెట్టిన శ్రాద్ధం వారే వచ్చి తీసుకోవాలి అని లేదు. అది వారికి చెందుతుంది అంతే.

ఇచ్చిన డబ్బు టెలిగ్రాఫిక్ మనీయార్డరు ద్వారా చిరునామాకు చేర్చబడింది కదా? అతను ఈ దేశములో నివసించకపోయినా, అక్కడ మన డబ్బు చెల్లుబాటు కాదు కాబట్టి, ఇక్కడ రూపాయిలలో ఇచ్చినా అక్కడి డాలర్లుగానో, పౌండ్లగానో మార్చి ఇవ్వబడే వ్యవస్థ ఉంటుంది. అలాగే ఈశ్వరుని వ్యవస్థలో కూడా పితృదేవతలకు సమర్పించినది వారికి చెందుతుంది.

ఇక్కడ ముఖ్యముగా ఉండవలసినది తల్లితండ్రులయందు కృతజ్ఞతా భావము. శాస్త్రముయందు నమ్మకము. శ్రద్ధతో పెట్టేది శ్రాద్ధము. నమ్మకానికి చాలా ప్రాముఖ్యత ఉంది. మనం ఏదైనా చేస్తే అది ఎలా చెప్పబడిందో ఎలా చెయ్యాలో అలాగే చెయ్యాలి. మనం ఒక ఉత్తరం రాస్తే అది ఎవరికి చేరాలో వారికి చేరుతుందా? “నేను నా ఇష్టం వచ్చిన చిరునామా వ్రాస్తాను. పోస్ట్ డబ్బాలో వెయ్యను. మా ఇంట్లో ఉన్న డబ్బాలో వేస్తాను అంటే అది చేరదు.”

ప్రేమ, భక్తి, జ్ఞానము వంటి స్థితులకు ఎటువంటి నియమము లేదు. కాని ఫలమాసించి చేసే ఏ కర్మకైనా నియమము అవసరము. ఆ నియమములను తెలిపేదే శాస్త్రము. శ్రద్ధతో సశాస్త్రీయంగా చేసిన శ్రాద్ధం తప్పక ఫలితాన్నిస్తుంది.

“తస్మాత్ శాస్త్ర ప్రమాణంతే కార్యా కార్యా వ్యవస్థితౌ”

--- “దయివతిన్ కురల్“ పరమాచార్య స్వామి వారి ఉపన్యాసముల సంగ్రహము

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

నైవేద్యం - నాలుక

తిరుచిరాపల్లిలో పరమాచార్య స్వామి భక్తుడు ఒకరు ఫోటోస్టూడియో పెట్టుకుని నివసించేవారు. అతని ఇంటి పూజగదిలో పరమాచార్య స్వామి వారి చిత్రపటమే ప్రముఖము.

రోజూ ఉదయం లేచిన వెంటనే స్నానాదులు ముగించుకుని, స్వామి వారి చిత్రపటము ముందు ఏదేని ఒక పదార్థము నివేదన చేసిన తరువాతనే తన దినచర్యను ప్రారంభించేవారు. అతని పెదవులపై ఎప్పుడూ పరమాచార్య స్వామి వారి నామము నర్తిస్తూ ఉంటుంది.

ఒక మారు పరమాచార్య స్వామి వారు మన ఆంధ్రదేశంలోని కర్నూలు జిల్లాలో పర్యటిస్తున్నారు. అది ఎండాకాలం కావడం వల్ల ఎండలు ఎక్కువగా ఉన్నాయి. తిరుచిరాపల్లిలోని ఈ భక్తునికి పరమాచార్య స్వామి వారి దర్శనం చేసుకోవాలనిపించింది. అతను ట్రైనుకు బయలుదేరే ముందు ఒక గిన్నెలో పాలు పోసి స్వామి వారికి నివేదన చేసాడు.

భక్తులు చాలా మంది స్వామి వారి దర్శనానికి రావడంతో వారు విడిది చేసిన ప్రాంగణమంతా నిండిపోయింది. జనసందోహంతో ఆ ప్రాంతమంతా జన సముద్రాన్ని తలపిస్తోంది. ఈ భక్తునికి పరమాచార్య స్వామి వారి దర్శనం దొరకలేదు. అతను ఒక ఇసుక కుప్ప పైన నిల్చుని దూరంనుండే మహాస్వామి వారి దర్శనం చెయ్యడానికి ప్రయత్నించాడు.

కాని అక్కడి ఎండలవల్ల అతని పాదాలు కాలాయి. సాయింత్రం కొద్దిగా జనాలు తగ్గిన తరువాత వద్దాం అని తిరిగి వెళ్ళీపోతున్నాడు. అంత దూరం నుండి వస్తే తనకు పరమాచార్య స్వామి వారి దర్శనం దొరకనందుకు మనస్తాపం చెందాడు.

కొద్ది దూరం వెళ్ళాడో లేదో ఎవరో తనను పిలుస్తున్నట్టు అనిపించి వెనకకు తిరిగాడు. స్వామి వారి పరిచారకులొకరు వచ్చి “నీవు తిరుచిరాపల్లి నుండి వచ్చావా?” అని అడిగారు.

”అవును”

“పరమాచార్య స్వామి వారు నిన్ను తీసుకురమ్మన్నారు”

“నన్ను తీసుకురమ్మన్నారా?” ఆ భక్తుడు ఆశ్చర్యపోయాడు.

”నువ్వు ఫోటోలు తీసేవాడివా?”

“అవును”

“అలా అయితే నాతో రా”

అతను ఆ భక్తుణ్ణి తీసుకువెళ్ళి మహాస్వామి వారి ముందు నిలబెట్టాడు. చేతులు జోడించి, కళ్ళ నీరు కారుతుండగా అతను బాహ్యమును మరచి మహాస్వామి వారి ముందు నిలబడ్డాడు.

అతన్ని చూసి మహాస్వామి వారు, “నన్ను చూడడానికి అంత దూరం నుండి వచ్చావు? మరి నన్ను చూడకుండా వెళ్ళడం వల్ల ఏమిటి ప్రయోజనం?” అని అడిగారు.

ఆ భక్తుడు నిచ్చేష్టుడై “చాలా రద్దీగా ఉంది. సాయంత్రం కొద్దిగా తగ్గిన తరువాత వద్దామనుకున్నాను” అని అన్నాడు.

”సరే. భోజనం చేసావా?”

“తిన్నాను పెరియవా”

కొద్ది క్షణాల తరువాత మహాస్వామి వారు అతనితో, “నా నోటి వైపు ఒకసారు చూడు” అన్నారు. పరమాచార్య స్వామి వారు నాలుక బయటికి చాపారు. అది ఎర్రగా వేడి వల్ల కమిలిపోయినట్టు ఉన్నది. తరువాత అతనితో “నా పెదవులు కూడా బొబ్బలొచ్చాయి. ఎందుకో తెలుసా?” అని అడిగారు. ఆ భక్తునికి ఏమి అర్థం కాలేదు.

“నువ్వు వేడి పాలను నాకు నివేదన చేసి గాబరాగా ఇక్కడికి వచ్చేసావు అందుకు” అని అన్నారు.

ఆ భక్తుడు అప్పుడు గుర్తు తెచ్చుకున్నాడు ఉదయం తను వేడి పాలను స్వామి వారికి నివేదన చేసాడు. వెంటనే అతను నేలమీద పడిపోయి, స్వామి వారికి సాష్టాంగం చేస్తూ గట్టిగా ఏడుస్తూ “మహాప్రభో నన్ను క్షమించండి” అని వేడుకున్నాడు.

అతనికి ఉన్న భక్తికి, అతని సమర్పణని స్వీకరించారు స్వామి వారు. ఇటువంటి భక్తి సాత్వికమైనది, మంచిది, సున్నితమైనది. భగవంతుణ్ణి భక్తుడి వద్దకు రప్పించుకునేది ఈ భక్తి మాత్రమే.

--- రా. వెంకటసామి, శక్తి వికటన్ ప్రచురణ

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

భావనామాత్రసంతుష్ట హృదయాయై

అమ్మవారి నామాలలో ఇది ఒక నామం. కేవలం ‘భావన చేత సంతృప్తి చెందే తల్లి హృదయం కలిగినది' అమ్మవారు అని అర్థం. ఆ అమ్మవారి స్వరూపమైన పరమాచార్య స్వామి వారు కూడా అంతే. అందుకు ఉదాహరణ నా జీవితంలో జరిగిన ఈ సంఘటన.

2014 వైశాఖ బహుళ పాడ్యమి పరమాచార్య స్వామి వారి 120వ జయంతి సందర్భంగా, స్వామి వారికి 120 ద్రవ్యాలతో అభిషేకం చేద్దామని ఆ ద్రవ్యముల పేర్లు అన్నీ రాసుకుని అలా చేయాలి ఇలా చేయాలి అనుకుంటున్న సమయం. కానీ, తీరా చేయవలసిన రోజున చేయలేక పోయాను. అందుకు రెండు రోజులు ముందు మా బాబాయి గారు నన్ను తమ ఇంట్లో వైశాఖ పౌర్ణమి సందర్భంగా సత్యనారాయణ వ్రతం చేసుకుందాం రమ్మన్నారు. నేను బయలుదేరి వారి ఊరికి వెళ్ళాను. మా పిన్ని గారి స్నేహితురాలు ఒకావిడ వస్తుండడం వల్ల తనని ఇంటికి తీసుకురమ్మని చెప్పారు. నాకు ఆవిడ ముందే పరిచయం ఉండడం వల్ల నేను వెళ్ళి ఆవిడను ఇంటికి తీసుకుని వచ్చాను.

ఆమె వాళ్ళ ఊరికి వెళ్తూ బస్సు ప్రయాణ బడలిక వల్ల వెన్నునొప్పి ఎక్కువ అవడంతో కొద్దిసేపు విశ్రాంతి తీసుకుందామని ఇలా మా ఇంటికి వచ్చారు. పిన్నిగారు పూజకు సిద్ధం చేస్తూ, పరమాచార్య స్వామి వారి గురించి ఆవిడతో మాట్లాడుతున్నారు. వెంటనే ఆవిడ ఏదో గుర్తుకు వచ్చినట్టుగా తన బ్యాగులో నుండి కంచిలో పరమాచార్య స్వామి వారి బృందావనానికి అభిషేకం చేసిన నీటిని ఒక బాటిల్ లో ఇచ్చారు. మేము దాన్ని తీసుకుని కళ్ళకద్దుకుని, తరువాత పుక్చుకుందామని దాచి పెట్టాము. ఆవిడ భోజనం చేసి వాళ్ళ ఊరికి వెళ్ళిపోయారు.

మరుసటి రోజు సత్యనారాయణ స్వామి వ్రతం చేసుకుని మా పనుల్లో నిమగ్నమైపోయాము. బాబాయి, పిన్ని వాళ్ళ పనులపైన వేరే ఊళ్ళకు వెళ్ళిపోయారు. ఆ మరుసటి రోజు, అనగా పరమాచార్య స్వామి వారి జయంతి రోజు, ఉదయం లేచి సంధ్యావందనం చేస్తూ, “ఇంట్లో ఉండి ఉంటే పరమాచార్య స్వామి వారికి కనీసం మామూలు పూజ అయినా చేసుకునేవాడిని కదా” అని అనుకున్నాను.

అంతలోనే బాబాయి నుండి కబురు వచ్చింది. తను రావడం ఆలస్యమవుతుంది కనుక ఇంట్లో నిత్యపూజ చెయ్యమని. ఆహా! ఏమి మహాస్వామి వారి కరుణ. మస్సులో తలచుకోగానే ఆ అదృష్టాన్ని కల్పించారు. సంతోషంగా బాబాయి ఇంట్లో ఉన్న శివ పంచాయతనానికి శ్రీరుద్రంతో అభిషేకం చేసి, పరమాచార్య స్వామి వారి పటానికి అష్టోత్తరంతో పూజ చేసుకున్నాను. 120 ద్రవ్యాలతో చేద్దామనుకున్న కాని ఒట్టి నీటీతో చేయవలసివచ్చినందుకు బాధపడుతూ, పూజ ముగించి తీర్థం తీసుకోబోతున్నాను. అప్పుడు గుర్తుకు వచ్చింది, నిన్న ఆవిడ ఇచ్చిన మహాస్వామి వారి బృందావన అభిషేక తీర్థం ఉంది కదా అని. వెంటనే ఆ తీర్థం చేతులలోకి తీసుకోబోతూ మన్సులో అనుకున్నాను.

అసలు ఈ తీర్థం ఇక్కడికి ఎలా వచ్చింది? అసలు బాబాయి అంత ఆతృతగా సత్యనారాయణ వ్రతం చేసుకుందామని అనుకోవడం, దానికి నన్ను పిలవడం ఏమిటి? కంచి నుండి వారి ఊరికి వెళ్తూ ఆవిడకు కలిగిన అసౌకర్యం వల్ల మా ఇంటికి రావడం ఏమిటి? ఇచ్చిన తీర్థాన్ని అప్పుడే పుచ్చుకోకుండా అలా ఉంచేయడం ఏమిటి? సరిగ్గా నేను పూజ పూర్తి చేసుకుని తీర్థం తీసుకుంటున్న సమయంలో ఇది గుర్తుకురావడం ఏమిటి? ఇలా అనుకున్నంతనే నా శరీరం రోమాంచితమై కళ్ళ నీరు కారుస్తూ మహాస్వామి వారి పటం వైపు చూశాను.

స్వామి వారి ఆ కరుణారస పూరితమైన నేత్రాలలో “120 ద్రవ్యాలతో నాకు అభిషేకం చెయ్యలేకపోయాని బాధపడకు. చెయ్యాలి అని అనుకున్నావు కనుక కంచి నుండి బృందావన అభిషేక తీర్థాన్ని పంపిస్తున్నాను. తీసుకో” అని అన్నట్టు అనిపించి సంతోషంతో కళ్ళ నీరు కారుస్తూ ఆ తీర్థం తీసుకున్నాను.

--- వెల్లంకి కార్తికేయ శర్మ, “కంచి పరమాచార్య వైభవం” అడ్మిన్

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

వరు వాయ్ అరుళ్ వాయ్

నాకు ప్రతిరోజు ‘కందర్ అనుభూతి’ పారాయణ చెయ్యడం అలవాటు. పూర్వజన్మ కర్మ వల్లనో మరే కారణం చేతనో నేను ఆర్థికంగా ఎదగలేక పోయాను. ఇదే స్తోత్రం పారాయణం చేసే నా స్నేహితుడు ఒక సారి పరమాచార్య స్వామి వారితో, తను రోజూ కందర్ అనుభూతి పారాయణ చేస్తానని, తన ఆర్థిక ఇబ్బందుల నుండి బయట పడడానికి ఏవైనా కొన్ని స్తోత్రములు కాని పూజలు కాని తెలుపవలసినదని కోరాడు.

“నువ్వు ప్రతి రోజూ కందర్ అనుభూతి పారాయణ చేస్తున్నావా? అంతకంటే ఇంకేం కావాలి నీకు? నీ ఆర్థిక ఇబ్బందులు పోగొట్టడానికి అది చాలు“ అని పరమాచార్య స్వామి వారు సెలవిచ్చారు.

కాని నా స్నేహితుడు మహాస్వామి వారితో “అలా కాదు పెరియవ! నాకు మురుగన్ పై ఉన్న భక్తి వల్ల నేను కందర్ అనుభూతి పారాయణ చేస్తున్నాను. కాని ఇప్పుడు నాకు కావలసింది ధనం. దయచేసి నాకు ఏమైనా ఉపాయం తెలపండి” అని అన్నాడు.

ఆ స్తోత్రం యొక్క చివరి పాదంలో ‘వరువాయ్ అరుళ్ వాయ్’ అని ఉంటుంది. అంటే వచ్చి నన్ను దీవించు అని అర్థం. అక్కడక్కడ ‘గురువాయ్ వరువాయ్ అరుళ్ వాయ్’ అని కూడా ఉంది. లేదా? ఉంది కదా?” అని అన్నారు.

అతను అవునన్నట్టు తల ఊపాడు.

మహాస్వామి వారు ఈ పాదంలో షణ్ముఖుని అనుగ్రహాన్ని వర్ణిస్తూ ”వరువాయ్ అను పదానికి రమ్మని, డబ్బు(ఆదాయం) అని కూడా అర్థం. అంటే ఇక్కడ సుబ్రహ్మణ్యున్ని గురువుగా కీర్తిస్తూ, వచ్చి నన్ను దీవించమని, గురు అనుగ్రహంతో ధనము ఇమ్మని కూడా అడుగుతున్నట్లేగా!” అని చెప్పారు.

పరమాచార్య స్వామి వారు నా స్నేహితునికి, కందర్ అనుభూతి పారాయణ వల్ల ‘కార్తికేయుడు గురువుగా వచ్చి ధన సమృద్ధితో అనుగ్రహిస్తాడు’ అని అర్థమయ్యేట్టు చేసారు.

ఇది స్కందుని భక్తులకందరికి పరమాచార్య స్వామి వారు నేర్పుతున్న పాఠమే. ఈ సంఘటన వల్ల నాకు కూడా ణెను పడుతున్న వ్యథ నుండి ఉపశమనం లభించింది.

[కందర్ అనుభూతి – స్కందునిపై అరుణగిరినాథర్ పాడిన పాటల సంపుటి. ఈయన తిరువణ్ణామలై వాసి. పరకాయ ప్రవేశ విద్య తెలిసిన ఈ సాధువు వేరొకరి కుట్ర వల్ల శాశ్వతంగా చిలుక శరీరంలో ఉండిపోయి, తిరువణ్ణామలైలోని అరుణాచలేశ్వరుని గుడి గోపురంలో కూచొని పాటలు పాడేవాడు. అలా పాడిన పాటలే ఈ కందర్ అనుభూతి]

--- మేలట్టూర్ యస్ రామచంద్రన్, మహాపెరియవళ్ – దరిశన అనుభవంగళ్ 2

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

వినాయకుడు - విరుగుడు

నేను ఒకసారి కంచి మఠం వెళ్ళినప్పుడు ఒక అర్చకులు నాకు ఈ కింది విషయం చెప్పారు.

దాదాపు 45 సంవత్సరాల కిందట పరమాచార్య స్వామి వారు తిరుచిరాపల్లికి దగ్గర్లోని ఒక పల్లెటూరిలో మకాం చేస్తున్నారు. ఒకరోజు వారు చంద్రమౌళీశ్వర పూజకు ఉపక్రమిస్తూ, మఠం మేనేజరుతో “ఇంక కొద్దిసేపట్లో అఖిలాండేశ్వరి అమ్మవారి ఆలయ అర్చకులు ఇక్కడికి వస్తారు. వారికి భోజనాలు పెట్టించి, 2 గంటలకు నా వద్దకు తీసుకుని రా” అని చెప్పారు.

అక్కడే నిలబడి ఉన్న ఒక శిష్యుడితో, “మఠం స్థపతితో చెప్పి రెండు అడుగుల వినాయకుని విగ్రహం తయారు చెయ్యమని చెప్పు” అని ఆజ్ఞాపించారు.

మహాస్వామి వారి ఆజ్ఞ ప్రకారం మేనేజరు అర్చకులను మఠం సంప్రదాయం ప్రకారం స్వాగతించి, మద్యాహ్న సమయం కావడం వల్ల వారికి భోజన సదుపాయం ఏర్పాటు చేసి వారి భోజనం తరువాత స్వామి వారి వద్దకు తీసుకుని వెళ్ళాడు.

పరమాచార్య స్వామి వారు అందరినీ పేరుపేరునా వారి బాగోగులు అడిగి తెలుసుకున్నారు. ప్రధాన అర్చకులు పరమాచార్యస్వామి వారితో, “పెరియవ రోజూ ఉదయం అర్చకులు ఎవరైతే అఖిలాండేశ్వరి అమ్మవారి ఆలయ గర్భగృహం తలుపులు తీసి లోపలికి వెళ్తున్నారో, ఆ వెళ్ళినవారు వెంటనే కళ్ళు తిరిగి పడిపోతున్నారు. మళ్ళా పది నిముషములు ఉపచారము చేసిన తరువాతనే స్వస్థత పొందుతున్నారు. కావున మిగిలిన అర్చకులు ఎవరూ లోపలికి వెళ్ళడానికి సాహసించడం లేదు” అని తమ బాధను చెప్పుకున్నారు.

వెంటనే మహాస్వామి వారు వారితో, “రేపు నేనే స్వయంగా దేవాలయానికి వస్తాను. నేను వచ్చిన తరువాతనే మీరు ఆలయ తలుపులు తెరవండి” అని చెప్పి వారికి ప్రసాదాన్ని ఇచ్చి పంపించారు.

మరుసటి రోజు తెల్లవారుఝామున 5:30 గంటలకు పరమాచార్య స్వామి వారు అఖిలాండేశ్వరి అమ్మవారి ఆలయానికి వచ్చారు. ఒక అర్చకుడు అమ్మవారి గర్భగృహం తలుపులు తెరిచాడు. వెంటనే కళ్ళు తిరిగి కింద పడిపోయాడు. పది నిముషముల తరువాత లేచి తన పనులకు వెళ్ళిపోయాడు. అది చూసి మహాస్వామి వారు కొద్దిసేపు ధ్యానంలోకి వెళ్ళారు. తరువాత ఆలయ ప్రధాన అర్చకుణ్ణి పిలిచి, “రేపటినుండి అతణ్ణి గర్భగృహం పక్క ద్వారం నుండి లోపలికి వెళ్ళమని చెప్పండి” అని ఎల్ల వెళ్ళాలో చెప్పి, తలుపులు తీసిన రెండు నిముషముల తరువాత లోపలికి వెళ్ళండి అని చెప్పారు.

సాయంత్రం స్థపతి వినాయకుని విగ్రహం తీసుకుని పరమాచార్య స్వామి వారి వద్దకు వచ్చాడు. స్వామి వారు ఒక మంటప నిర్మాణం చేసి, దాని పైన ఈ వినాయకుడి విగ్రహాన్ని ప్రతిష్టించమని చెప్పారు. అది ఎలా ఉండాలి అంటే “అమ్మవారి దృష్టి కాంతి, వినాకుడి దృష్టి కాంతి సమాంతరంగా ఒకటికొకటి కలవాలి” అలా నిర్మాణం చెయ్యవలసిందని చెప్పారు. స్వామి వారు చెప్పినట్టుగానే ఆలయంలో వినాయకుణ్ణి వారి అమ్మగారైన అఖిలాండేశ్వరి ఎదురుగా ప్రతిష్టించారు. ఆగమోక్తంగా ప్రతిష్ట పూజలు నిర్వహించారు. అప్పటి నుండి అర్చకులకు కళ్ళుతిరిగి పడిపోవడం జరుగలేదు.

ఇప్పటికీ, అష్టమూర్తి క్షేత్రములలో ఒకటైన, జల లింగ క్షేత్రమైన జంబుకేశ్వరం(తిరువణైకావల్) లోని అఖిలాండేశ్వరి అమ్మవారి ఆలయానికి ఎదురుగా వినాయకుడు ఉంటాడు. తల్లి తొలి చూపు తన తొలి బిడ్దడిపై ప్రసరించేట్టుగా పరమాచార్య స్వామి వారు సుముఖుడైన వినాయకుని ప్రతిష్ట చేయించారు.

[సాక్షాత్ పరమశివ అవతారులైన ఆదిశంకరాచార్యుల వారు, రాబోవు కాలాములలో ప్రజలు అనుష్టానము లేక, తపశ్శక్తి లేక దేవతా మూర్తుల ఎదురుగుండా నిలబడలేరని గ్రహించి, ఎక్కువగా ఉన్న తేజస్సును లెక్కకట్టి దాన్ని శ్రీచక్రంలోకి తీసి అక్కడే శ్రీచక్ర ప్రతిష్ట చేసారు. జంబుకేశ్వరం జల క్షేత్రం కావటం చేత అమ్మవారి సువర్ణ తాటంకాలలో శ్రీచక్రం వేసి అమ్మవారికి ధరింపచేసారు]

--- ఎ. త్యాగరాజన్, చెన్నై - శక్తి వికటన్ ప్రచురణ

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

మహాస్వామి – ముస్లిమ్ భక్తుడు

కంచి కామకోటీ పీఠాధిపతులు శ్రీ శ్రీ శ్రీ చంద్రశేఖరేంద్ర సరస్వతి స్వామి వారు పండరీపురంలో మకాం చేస్తున్నారు. వారి దర్శనం కోసం మేము అక్కడికి బయలుదేరాము. మేము ఎక్కిన రైలు పండరీపురం చేరుకుంది. చంద్రభాగా నది ఆవలి ఒడ్డున ఒక చిన్న మఠంలో బస చేస్తున్న పరమాచార్య స్వామి వారి దగ్గరికి వెళ్ళడానికి ఎలాగా అని అలోచిస్తూ నిలుచున్నాము.

ఆ రోజుల్లో టాక్సీలు అవి ఏవి లేవు. అప్పుడు ప్రాయాణ సాధనం గుర్రపుబండి మాత్రమే. నా కళ్ళు ఒక టాంగా వాడి మీద పడ్డాయి. చూడడంతోనే అతను మహమ్మదీయుడు అని తెలిసిపోవడం వల్ల స్వామి వారి గురించి అతనికి తెలిసి ఉండదని వేరొక టాంగా కోసం వెతికాను. అక్కడ అతను తప్ప ఎవరూ లేక పోవడంతో వెళ్ళి అతనితో, “శంకరాచార్య స్వామి వారు ఎక్కడ బసచేసి ఉన్నారో నీకు తెలుసా?” అని అడిగాను. అతను “కంచి పెరియవనా? వారు తెలియకేం చాలా బాగా తెలుసు. మిమ్మల్ని అక్కడికి తీసుకుని వెళ్తాను. ఆయన మాకు అల్లా” అని బదులిచ్చాడు. నేని కొంచం ఆశ్చర్యపోయి, సరే పదమన్నాను.

మేము స్వామి వారున్నచోటికి చేరుకున్నాము. ఆ టాంగావాలా మాతో డబ్బు తీసుకోవడానికి నిరాకరించాడు. అతను సరాసరి పరమాచార్య స్వామి వారు కూర్చుని ఉన్న చోటికి మమ్మల్ని తీసుకుని వెళ్ళాడు. అతను ఆనందంతో, తల్లి దగ్గరికి నెలల బిడ్డ వెళ్ళిన చందంగా స్వామి వారి దగ్గరికి వెళ్ళి కూర్చున్నాడు. అది అతనికి ఈ జన్మకు లభించిన హక్కు కాబోలు, పరమాచార్య స్వామి వారు కూడా ఏమి మాట్లాడలేదు. స్వామి వారికి మమ్మల్ని పరిచయం చేసాడు. తరువాత తను మాతో, ”వీరు వచ్చిన నాటినుండి మా జీవితాలు ధన్యమయ్యాయి. తాగుడు మొదలైన వ్యసనాలను త్యజించాము” అని అన్నాడు. అతను కళ్ళారా చూసిన ఒక సంఘటనని మాతో పంచుకున్నాడు.

చంద్రభాగా నది ఎగువ ప్రాంతంలో వర్షాలు ఎక్కువై నదికి వరదలు వచ్చాయి. ప్రమాదపు అంచులో నది ప్రవాహం ఉంది.

ఆరోజు స్వామి వారు వారు నిద్రలేచారు. వరద ఉధృతి ఎక్కువగా ఉంది వెళ్ళొద్దని అందరూ బ్రతిమాలుకున్నా స్వామి వారు స్నానానికై నదికి వెళ్ళారు. నదిలోకి వెళ్ళి వారి దండాన్ని ఒకచోట నిలబెట్టారు. ఆశ్చర్యకరంగా వరద నీరు ఆ దండం దరిదాపుల్లోకి కూడా రాలేదు. అక్కడినుండి వరద వెనుకకు వెళ్ళనారంభించింది. నేను కూడా నదిలో స్నానం చేసాను.

“నేను ప్రత్యక్ష సాక్షిని” అని భావోద్వేగంతో చెప్పాడు ఆ సాధారణ ముస్లిమ్ భక్తుడు.

[ఆదిశంకరాచార్యుల వారు గురువు అన్వేషణలో భాగంగా నర్మదానదీ పరీవాహక ప్రాంతానికి వచ్చినప్పుడు, నదికి వరద వచ్చింది. వారు తమ కమండలంలో ఆ వరద నీటినంతటినీ పట్టి వరద ముంపు నుండి కాపాడారు. అలా చేసినవాడే నీకు శిష్యుడై, జగద్గురువై సనాతన ధర్మాన్ని ఉద్ధరిస్తాడని గోవిందభగవత్పాదులకు వారి గురువులు గౌడపాదుల వారు చెప్పారు.]

--- శ్రీమతి పద్మా సుబ్రహ్మణ్యం గారి ‘శ్రీ మహాపెరియవ స్మృతులు’ నుండి

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

వేద స్వరం - శిక్ష

మహా పెరియవర్ సాక్షాత్ పరమాత్మ స్వరూపులు, శివావతారులు. ఈ శతాబ్ధపు ఆది శంకరాచార్యులు. అప్పుడు స్వామి వారు కుంబకోణంలోని కంచి మఠంలో మకాం చేస్తున్నారు. వ్యాస పూర్ణిమ చాలా ఘనంగా జరిగింది. చంద్రమౌళీశ్వర పూజ పూర్తి అయిన తరువాత భక్తులందరూ పరమాచార్య స్వామి స్వహస్తాలతో ఇచ్చే అభిషేక తీర్థం కోసం ఆత్రుతగా వచ్చారు. వరుసగా నిలబడి వస్తున్న వాళ్ళలో ఒక భక్తుణ్ణి మహాస్వామి వారు తలెత్తి చూసారు.

వారు అతనితో, ”రేపు తెల్లవారుఝామున జరిగే వేదపారాయణానికి రా” అని అన్నారు. మహాస్వామి వారి ఆజ్ఞకి తిరుగేముంది?

స్వామి వారి ఆదేశం మేరకు మరుసటిరోజు ఉదయాన్నే వచ్చి, వేదపారాయణంలో పాల్గొన్నాడు. పారాయణం జరుగుతూ ఉండగా ఆశ్చర్యకరంగా మహాస్వామి వారు వచ్చారు. వారు చాలా అరుదుగా వస్తారు.

నిన్న తాము రమ్మన్న భక్తుడు చాలా శ్రద్ధగా భక్తితో వేదాలను ఆమ్నాయం చెయ్యడం గమనించారు. వేదపారాయణం తరువాత అందరికి తీర్థప్రసాదాలు ఇచ్చు సమయంలో అతన్ని పిలిచి కొద్దిసేపు వేచియుండమన్నారు.

ఆ భక్తుడు భయంతో మనసులో నేను వేదమంత్రాలు సరిగ్గా ఉచ్ఛరింలేదేమో అందుకే మహాస్వామి వారు ఉండమన్నారు అని అనుకున్నాడు. కొద్దిసేపటి తరువాత, మహాస్వామి వారు ఆజ్ఞాపించారు అని ఒక వైద్యుడు వచ్చి, అతన్ని పూర్తిగా పరీక్ష చేసారు. తరువాత అతని వైద్యశాలకు తీసుకుని వెళ్ళీ ఇంకొన్ని పరీక్షలు చేసిన తరువాత ఆ భక్తుడికి హృదయ సంబధమైన జబ్బు ఉందని తెలుసుకున్నారు.

పరమాచార్య స్వామి వారి ఆదేశానుసారం ఆ వైద్యుడు, ఏ శస్తచికిత్స అవసరం లేకుండానే ఆ భక్తుని జబ్బు నివారించాడు.

పది రోజుల తరువాత ఆ భక్తుడు మహాస్వామి వారి దర్శనానికి వచ్చాడు. అతని మనస్సులో ఉన్న ప్రశ్నలకు సమాధానంగా మహాస్వామి వారు అతనితో,

“నువ్వు వేదం చాలా శ్రద్ధతో పఠిస్తున్నావు కాని, మంత్రాలను ఉచ్ఛరిస్తున్నప్పుడు నీకుగల శ్వాస సంబంధమైన రుగ్మత చేత, చాలా ఇబ్బందిగా పలకడం వల్ల అక్కడక్కడ స్వరం తప్పుతున్నది. నేను దాన్ని గుర్తించి బహుశా నీకు ఊపిరితిత్తులు లేక గొంతు సమస్య ఏదో ఉన్నదని గ్రహించి వైద్యుణ్ణి రప్పించాను” అని అన్నారు.

తరువాత “కొద్దిసేపు వేదం పారాయణం చెయ్యి” అని ఆజ్ఞాపించారు.
అతను స్వరం తప్పకుండా ఎటువంటి ఇబ్బంది లేకుండా వేదం చెప్పాడు. మహాస్వామి వారు చాలా సంతోషించి అతణ్ణి ఆశీర్వదించారు.అలా ఆ భక్తుడికి ముందు జరగబోయే ఉపద్రవాన్ని మహాస్వామి వారు తప్పించారు.

ఎప్పుడైతే మనం భక్తితో పరమాత్ముణ్ణి ప్రార్థించి, సేవిస్తామో మనకు రాబోయే బాధలు కష్టాలు మన దరిచేరకనే కరిగిపోతాయి.

--- రా. వెంకటసామి, శక్తి వికటన్ ప్రచురణ

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

క్యాన్సర్ వ్యాధి – కనకల్ చికిత్స

దాదాపు ముప్పై సంవత్సరాల క్రితం జరిగిన ఒక సంఘటన. ఎచంకుడి గణేశ అయ్యర్ పరమాచార్య స్వామి వారికి పరమ భక్తుడు.

వారి భార్య కడుపులో క్యాన్సర్ కారణంగా చాలా బాధ పడేవారు. ఆపరేషన్ చేయించుకోవాలని, లేదంటే ఈ వ్యాధితో బ్రతకడం చాలా కష్టం అని చెప్పేవారు వైద్యులు.

గణేశ అయ్యర్ మహాస్వామి వారి దర్శనానికి వచ్చి వారితో తన బాధను విన్నవించుకున్నారు.

మహాస్వామి వారు అతనితో "ఆపరేషన్ చేయవలసిన అవసరం లేదు. తిరుతురైపూంది సమీపములో తిరునెల్లిక్కావల్ అనే రైల్వేస్టేషన్ ఉంది. ఆ స్టేషనులో దిగి అక్కడి నుండి పడమర వైపు ఒక కిలోమీటర్ వెళ్తే ఒక నీటి కాలువ వస్తుంది. ఆ కాలువ ఒడ్డున ఒక పెద్ద చెట్టు ఉంది. దాని పేరు "కనకల్" (తమిళంలో). ఆ చెట్టు ఆకుల యొక్క కాడలను స్వీకరిస్తే కాన్సర్ నయం అవుతుంది” అని చెప్పారు.

పరమాచార్య వారి సలహా ప్రకారం తన భార్య చేత ఆ చెట్టు ఆకుల కాడలు తినిపించారు. ఆశ్చర్యముగా కొన్ని రోజులలో ఆమె పొట్టలో ఉన్న క్యాన్సర్ వ్యాధి తగ్గుముఖం పట్టి, కేవలం కొద్ది రోజులలలోనే పూర్తి ఆరోగ్యవంతురాలు అయ్యింది.

ఎప్పుడూ స్వామి వారిని ధ్యానించే ఆవిడ 80 సంవత్సరాలు పైగా జీవించారు. అంతే కాకుండా మహాస్వామి వారు బృందావన ప్రవేశం ముందు జరిగిన వారి కనకాభిషేకం చూసి ధన్యులు అయ్యారు.

--- శ్రీమఠం బాలు మామ, మహా పెరియవళ్ - దరిశన అనుభవంగళ్ 2

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

చెన్నై - కంచి

ఒక ఆటోమొబైల్ ఇంజనీర్ తన జీవితంలో జరిగిన అనుభవాన్ని ఇలా పంచుకున్నాడు..

నేను చెన్నైలోని ఒక ప్రైవేటు కంపెనీలో ఆటోమొబైల్ ఇంజనీర్ గా పని చేస్తున్నాను. ఈ సంఘటన 2005లో నేను కుంబకోణం నుండి చెన్నైకు తిరుగుప్రయాణం చేస్తున్నప్పుడు జరిగింది. నేను నా కుటుంబంతో సహా వేసవి సెలవుల కొసం అక్కడికి వెళ్ళాము. మా బంధువుల ఇళ్ళకు వెళ్ళాము మరియు కుంబకోణంలో ఉన్న అన్ని దేవాలయాలను సందర్శించడం కూడా మా ప్రణాళికలో భాగమే.

మా తిరుగు ప్రయాణం కోసం మే 24వ తేది ఉదయం 8 గంటలకు టికెట్స్ బుక్ చేసుకున్నాము. తమిళనాడులో ఉన్న పుణ్యక్షేత్రాలను సందర్శించడం చలా సంతోషం కలిగించే విషయం. తమిళనాడులో ఆలయ నగరముగా పేరుగాంచిన కుంబకోణంలోని దేవాలయాలు దర్శించడం నా చిరకాల వాంఛ.

మేము కుంబేశ్వర ఆలయం, సారంగపాణి ఆలయం మరియు శ్రీ ఒప్పిలిఅప్పన్ ఆలయాలు దర్శించాము. ఈ యాత్రలో చివరిగా కంచి మఠంను దర్శించటం మా ప్రణాలిక. మఠంలో ఉండగా నేను పొందిన అనుభూతి అనిర్వచనీయమైనది. మేము అక్కడ ఉండగా పరమాచార్య స్వామి వారి గురించి మఠం ధర్మకర్తలతో కొద్దిగా మాట్లాడాము. దాంతో నాకు వారి గురించి తెలుసుకోవాలని ఉత్సాహము మరియు ఆసక్తి కలిగి కొన్ని పుస్తకాలు తీసుకొన్నాను. తిరుగుప్రయాణంలో చదువుటకు నిశ్చయించుకున్నాను.

ఆ రోజు రాత్రి నా కలలో మహాస్వామి వారు స్వప్న దర్శనమిచ్చారు. వారు నాతో "నా వద్దకు రండి" అని చెప్పారు. నేను మధ్యలోనే నిద్రలేచి సమయము చుస్తే ఉదయం 4 గంటలు. ఆ తరువాత నేను నిద్రపోలేదు స్వామి వారు నిద్రలో చెప్పిన దానిగురించే ఆలోచిస్తున్నాను. సుమారు ఉదయం 5:30 అప్పుడు నేను నా పిల్లలను భార్యను నిద్ర లేపి, సామాను సర్దుకొని తయారు అవ్వమన్నాను. ఎనిమిది గంటలకు మా తిరుగు ప్రయాణం కాబట్టి. అందరం అల్పాహారం ముగించుకొని మా అమ్మ, నాన్న మరియు బంధువులందరికి విడ్కోలు పలికి కారులో బస్సు ప్రాంగణానికి బయలుదేరాము.

కారులో కూర్చున్న తరువాత నా భార్యతో, చెన్నైకి వెళ్ళేముందు కంచి వెళ్ళి కామకోటి మఠాన్ని దర్శించాలని ఉంది అని చెప్పాను. మరునిమిషములో మా ప్రణాలికను మార్చుకుని కంచి వెళ్ళాలని నిర్ణయించుకున్నాము. ఉదయం 7:30 ప్రాంతములో టికెట్ కౌంటరుకి వచ్చి కాంచీపురం వెళ్ళడానికి బస్సుల గురించి అడుగగా, 8:30కి ఉంది అని చెప్పారు.

మేము చెన్నైకి పోయే బస్సు టికెట్స్ రద్దు చేసుకోవడం కుదరలేదు. కాంచీపురం బస్సు రావడంతో వెళ్ళి కంచి కామకోటి మఠంను సందర్శించాము. అక్కడకు వెళ్లగానే నా మనస్సుకు ఏదో తెలియని పులకరింతకలిగింది. అక్కడ చాల ఆహ్లాదంగా ప్రశాంతంగా అనిపించింది. ఒక గంటసేపు అక్కడ ఉండి మేము చెన్నైకి తిరుగు ప్రయాణం అయ్యాము.

మేము ఇంటికి వెళ్ళాక T.V చూస్తే ఒక వార్తవిని చాలా ఆర్చర్యానికి లోనయ్యాము. మేము చెన్నై రావడానికి టికెట్స్ తీసుకున్న బస్సుకి ప్రమాదం జరిగి, దానిలో ప్రయాణిస్తున్న ప్రయాణికులకు తీవ్రమైన గాయాలు అయ్యాయి. ఇది చాలా విషాదకరమైన సంఘటన.

కానీ నాకు ఇప్పటికి అర్థం కాని విషయం “హఠాత్తుగా ఎందుకు మా ప్రణాళిక మార్చుకున్నాము?” అని. ఆనాటినుండి నేను మహాస్వామి వారికి లొంగిపొయాను. నా జీవితాన్ని వారి పాదపద్మముల సేవకు అంకితం చెసాను. ఈరోజు వరకు లేవగానే నేను చేసే మొదటి పని పరమాచార్య స్వామి వారి పాద పద్మములు చూసి నమస్కరించడం.

--- మూలం : స్వస్తిక్ టివి

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

నా జీవితానుభవాలు

నేను ఆంధ్రప్రదేశ్ లోని కర్నూలు జిల్లా రహదారులు భవనాల శాఖ సూపరింటెండెంట్ గా పదవీవిరమణ చేశాను. మాది తిరువణ్ణామలై జిల్లా, చెయ్యర్ తాలూకా, ఏరయూర్ గ్రామం. ఇప్పుడు నాకు ఎనభైమూడు సంవత్సరాలు. 1989లో బస్సులో చెయ్యర్ నుండి చెన్నై వెళ్తున్నప్పుడు రోడ్డు పక్కన ఉన్న ఒక చిన్న గ్రామ దేవాలయంలో శ్రీ చంద్రశేఖర సరస్వతి స్వామివారిని దర్శించుకున్నాను. డ్రైవరు బస్సును ఆపి అందరిని స్వామివారి దర్శనం చేసుకోమని చెప్పాడు. నేను స్వామివారిని దర్శించుకుని సాష్టాంగం చేసి, నా పెద్ద కుమారునికి సంబంధం ఖాయం చేసుకోవడానికి చెన్నై వెళ్తున్నాను అని చెప్పాను. స్వామివారు నన్ను ఆశీర్వదించి, “చెన్నై ఎందుకు వెళ్తున్నావు? నీ కుమారుని వివాహం చెయ్యర్ లోనే కుదురుతుంది. వివాహం తరువాత ఆనందమయ జీవితం గడుపుతాడు” అని చెప్పారు.

ఆ పెళ్లి సంబంధం కుదరకపోవడంతో నేను చెన్నై తిరిగొచ్చాను. నా సోదరుడు హరినారాయణన్ చెయ్యర్ తాలూకాలోని ఏరయూర్ లో ఉంటూ సామాజిక సేవలు చేస్తూ చుట్టుపక్కల ఊళ్లు తిరుగుతూ ఉంటాడు. ఒకరోజు నేను తనతో పాటు చెయ్యర్ లోని వక్కడై గ్రామానికి వెళ్లాను. జిల్లాలోని ప్రముఖ వ్యక్తీ, భూస్వామి అయిన శ్రీ వక్కడై రామస్వామి అయ్యర్ గారిని కలిశాము. మాటల మధ్యలో నన్ను వారికి పరిచయం చేసి, నాకు పెల్లిదుకు వచ్చిన అబ్బాయి ఉన్నాడని వారితో చెప్పాడు. వెంటనే ఆయన మ అబ్బాయి జాతకం అడిగి తీసుకుని, తనకు పెళ్లీడుకు వచ్చిన మనవరాలు ఉందని అమ్మాయి జాతకం నా చేతిలో పెట్టారు.

రెండింటిని పరిశీలించిన జ్యోతిష్కులు జాతకాలు కుదిరాయని, అమ్మాయి జాతకం బ్రహ్మాండంగా ఉందని, పెళ్ళైకి పదిహేను రోజులు ఉందనగా ఉద్యోగంలో పదోన్నతి లభించి పుణ్యక్షేత్రానికి బదలీ అవుతాడని చెప్పారు. సంబంధం కుదుర్చుకున్నాము. మహాస్వామివారి ఆశీస్సుల వల్ల, జ్యోతిష్కులు చెప్పినట్టుగా పెళ్ళికి సరిగ్గా పదిహేనురోజుల ముందు, ఎక్సైజ్ ఇన్స్పెక్టర్ గా శ్రీకాళహస్తిలో పదోన్నతి లభించింది. ఇప్పుడు వాడికి ముగ్గురు కూతుళ్ళు. అందరూ మంచి చదువులు చదివి జీవితాల్లో స్థిరపడ్డారు.

నేను పదవీవిరమణ చేసిన తరువాత కర్నూలులో ఉన్నప్పుడు అక్కడ హంద్రీ నది ఒడ్డున ఉన్న పారిశ్రామిక వాడలోని ఒక పిండి మిల్లులో మేనేజరుగా చేరాను. 1984లో పరమాచార్య స్వామివారు ఈ మిల్లులో నలభైనాలుగు రోజులపాటు మకాం చేశారు. అప్పుడు వారి సేవ చేసుకునే భాగ్యం నాకు కలిగింది.

2002 తరువాత మా పిల్లలు విశ్రాంతి తీసుకొమ్మని చెప్పడంతో, పెరంబూర్ లోని చిన్న కొడుకు దగ్గర ఉంటున్నాను. ఇక్కడకు వచ్చిన తరువాత కామకోటి శంకరాచార్య ట్రస్టులో సభ్యుణ్ణి అయ్యాను. దాదాపు నెలకొకసారి ట్రస్టు సభ్యులతో కలిసి కాంచీపురం వెళ్తుంటాను. శంకరాలయం ట్రస్టు అధ్యక్షుడు నన్ను శ్రీ జయేంద్ర సరస్వతి స్వామివారికి పరిచయం చెయ్యగా, వారు నన్ను కర్నూలు కృష్ణమూర్తిగా గుర్తుపట్టి, సేవ చెయ్యమని ఆశీర్వదించారు. పరమాచార్య స్వామివారి అనుగ్రహం వల్ల, పిల్లలు బాగా స్థిరపడ్డారు, నేను సంతోషంగా ఉన్నాను.

--- టి. కృష్ణమూర్తి, పెరంబూర్. “మూమెంట్స్ ఆఫ్ ఎ లైఫ్ టైం” నుండి

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

ఆమెను భర్త దగ్గరకు వదిలి రా...

చాలా సందర్భాల్లో, ఇతరులపైన పరమాచార్య స్వామివారి ప్రేమ బహిర్గతం అవ్వదు. కాని ఒకసారి మహాస్వామివారు శ్రీమఠం బాలు మామని ఒక పని చెయ్యమని ఆదేశించారు. ఆ సంఘటన వివరాలు బాలు మామ మాటల్లో.

శ్రీమఠం మకాం షోలాపూర్ లో విడిది చేసి ఉన్నప్పుడు, ఒక సాయంత్రం మహాస్వామి వారు బాలు మామను పిలిచి, “. . . ఇతని ఇంటికి వెళ్లి, వారి అమ్మాయిని తీసుకుని తన భర్త ఇంటిలో వదిలిరా!” అని ఆజ్ఞాపించారు.

ఆ మాట విని బాలు మామ నిశ్చేష్టుడయ్యాడు.

పరమాచార్య స్వామివారు చెబుతున్న వ్యక్తీ స్వామివారికి పరమ భక్తుడు, వైశ్య కులానికి చెందినవాడు; పెద్ద సంసారం కలవాడు; ఏవో కారణాల వల్ల అతని కుమార్తె భర్త నుండి విడువడి, తల్లితండ్రుల వద్దే ఉంటోంది. కాని ఈ విషయం ఎవరూ మహాస్వామివారికి తెలుపలేదు. కాని స్వామివారి నుండి ఇటువంటి ఆదేశం వచ్చింది.

“ఏమిటి ఈ ఆదేశం? మరొకరి కుటుంబ విషయాల్లో నేను జోక్యం చేసుకోవడం ఎలా? ఆ అమ్మాయిని తీసుకునివెళ్ళి భర్త ఇంటిలో వదిలిరావాలా? ఇది సరైనదేనా?” అని పరిపరివిధాల ఆలోచిస్తున్నాడు బాలు మామ. ఎటువంటి ఆజ్ఞనైనా స్వామివారి నుండి వెలువడితే, సహాయకులెవ్వరూ మరొక్క ఆలోచన లేక అమలుచేస్తారు. కాని ఈ విషయంలో బాలు మామ సంకోచిస్తున్నాడు.

బాలు మామ ఇబ్బందిని అర్థం చేసుకున్న స్వామివారు అతనికి ధైర్యంగా ఉంటుందని, “నీతోపాటు బ్రహ్మచారి రామకృష్ణన్ ని కూడా వెంట తీసుకునివెళ్ళు” అని చెప్పారు.

వారు ఆ ఇంటికి వెళ్లి, స్వామివారి ఆదేశాన్ని వారికీ తెలిపారు. స్వామివారి ఆదేశాన్ని వినగానే అందరూ ఏడవడం మొదలుపెట్టారు. అమ్మాయిని అక్కడకు పంపడం అంటే, ప్రేమతో పెంచుకున్న చిలకను పిల్లి వద్దకు పంపడమే అని వారికి తెలుసు.

కాని వారికి మహాస్వామి వారిపై ఉన్న నమ్మకం, భక్తి చేత ఎటువంటి అనుమానానికి తావివ్వకుండా మనస్సును స్థిమితపరచుకున్నారు. పరమాచార్య స్వామివారే ఇలా ఆదేశించారంటే అందులో ఎదో ఉంటుందని వారికి తెలుసు. అమ్మాయిని పంపడానికి నిర్ణయించుకున్నారు.

ఆ అమ్మాయి ఎంత ఆలోచిస్తున్నాడో తన భర్త ఇంటికి వెళ్ళడానికి, బాలు మామ కూడా అంతే తటపటాయిస్తున్నాడు. కాని అది స్వామివారి ఆజ్ఞ కావడంతో ఇక బయలుదేరింది. ఏమి జరుగుతుందో అని భయపడుతూ ముగ్గురూ బయలుదేరారు.

వీళ్ళు అక్కడకు వెళ్ళగానే అత్తింటి వారు ఎంతో సాదరంగా వాళ్ళను ఆహ్వానించారు. వీరు ఎంతగానో ఆశ్చర్యపోయారు. ఆమె భర్త కూడా తనని ప్రేమతో ఆదరించి, ఇక్కడే ఉంచుకుంటాను అని ప్రమాణం చేశాడు.

--- శ్రీ రా. గణపతి, “శంకరర్ ఎండ్ర సంగీతం” నుండి.

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more

ఎవరి విగ్రహం అది?

నా కుమారుడు బాలాజి పుట్టినప్పుడు, జాతకాన్ని గణించమని జ్యోతిష్కులకు చెప్తే వారు, “పదహారు సంవత్సరముల వరకు ఈ అబ్బాయి యోగం సరిగ్గా లేనందున జాతకం ఇప్పుడు గణించడం కంటే ఆ తరువాత చెయ్యడం మేలు” అని చెప్పారు.

నా భార్య సరస్వతి చాలా కంగారు పడింది. తను మొక్కని దేవుడు లేడు, దర్శించని దేవాలయం లేదు, నోచని నోము లేదు. తను తిరుచెంగొట్టు అర్ధనారీశ్వరుని ఎక్కువగా ఆరాధించేది. మాకు ఇద్దరు కుమార్తెలున్నా, అబ్బాయి వీడొక్కడే కావున ఏ తల్లి మాత్రం తన ఒక్కగానొక్క కొడుకు నిండు నూరేళ్ళు బ్రతకాలని కోరుకోదు? మా ఆవిడకూడా అంతే. నెలలో చాలా రోజులు ఏదో ఒక వ్రతం పేరుతో ఉపావసం ఉండేది. కేవలం తన కుమారుని కోసం ఎంతటి కష్టాన్నైనా భరించేది సహించేది.

ఆరోజు గురువారం కాబట్టి ఉపవాసం ఉంటుంది. సాయింత్రం పూజ తరువాతనే అహారం సేవించేది. ఆ సాయింత్రం నా చిన్న కూతురు రాజం పాఠశాల నుండి వచ్చి, పాఠాలు చదువుకుంటూ హఠాత్తుగా తన తల్లి వంక తిరిగి, “అమ్మా అందరూ కంచి పరమాస్వామి వారి గురించి గొప్పగా చెప్తుంటారు. నువ్వెందుకమ్మా బాలాజి కోసం తనని ప్రార్థించకూడదు?” అని అడిగింది.

ఆ చిన్నపిల్ల నోటి నుండి వచ్చిన మాటలే దేవి పలికించిన మాటలుగా భావించి ఆ రోజునుండి నా భార్య పరమాచార్య స్వామి వారిని ప్రార్థించడం ప్రారంభించింది. మరొక ప్రత్యేకత ఏమంటే మా ఆవిడ ఏమి ప్రారంభించినా దాని గురించి చాలా శ్రద్ధగా తీవ్రంగా చేస్తుంది. కాబట్టి తను పిచ్చి దానిలా మహాస్వామి వారి ఆరాధన చెయ్యడం మొదలుపెట్టింది. తన ధ్యాస అంతా కంచి పరమాచార్యులవారే.

ఒక రోజు రాత్రి తనకు ఒక కల వచ్చింది. నేను వ్రాసుకోవడానికి ఉపయోగించే కుర్చీలో మహాస్వామి వారు కూర్చున్నారు. వారికి తనకు మధ్యలో శబ్ధం చేస్తూ నీరు ప్రవహిస్తోంది. ఇవతలివైపు నా భార్య కుమారుని కోసం ప్రార్థిస్తోంది. మహాస్వామి వారు ప్రశాంత వదనంతో “నీ ఖాతాలో పుణ్యాన్ని చాలా జమ చేసుకున్నావు. అందులో నుండి కొంత తీసుకుంటే అదేమి తగ్గదులే”

అంతలోనే కల చదిరిపోయింది. అది తెల్లవారుఝాము సమయం. అప్పటినుండి తనకు మహాస్వామివారే లోకం. తన స్నేహితులు తను కలిసి ప్రతి పౌర్ణమికి కంచికి వెళ్ళి కామాక్షి అమ్మవారిని మహాస్వామి వారిని దర్శించుకోవడం మొదలుపెట్టారు.

దీని గురించి నా ఆలోచన కొంచం వేరు. నా ఉద్దేశం పీఠాధిపతులను గౌరవిస్తే చాలు. వారిని దేవతలులాగా పూజించవలసిన పని లేదు.

ఇటువంటి సమయంలో నా స్నేహితుడొకరు పూంపుహార్ ఆర్ట్ శాప్ నుండి ఒక చిన్న దేవి విగ్రహాన్ని బహూకరించాడు. దీంతో కొత్త వాదనకు బీజం పడింది. ఇంట్లో ‘విగ్రహ ఆరాధన’ చెయ్యవచ్చా? చెయ్యకూడదా? అని.

దానికంటే ముందు అసలు ఆ విగ్రం ఏ దేవతది? నిశ్చయంగా ఏ దేవతా మూర్తియో చెప్పడానికి కుదరని అవస్థ.

నేను మా ఆవిడతో “కంచి మహాస్వామి వారిని చూడడానికి వెళ్తావు కదా, ఈ విగ్రహ శిల దేవతా మూర్తి గురించి ఆయన్ను అడుగు. వారు సరిగ్గా చెబితే నేను వారు మనుష్యులలో ఉన్న డేవుడని నమ్ముతాను” అని చెప్పాను.

”ఈసారి మీరూ మాతోపాటు రండి” అని అన్నది. ఏదో శక్తి నాచేత “సరేలే వెళ్దాం” అని పలికించింది. అందరమూ వెళ్ళాము. చలా మంది భక్తులు వారి దర్శనార్థమై వచ్చారు. ఒకరితరువాత ఒకరు స్వామి వారిని దర్శించుకొని ముందుకు వెళ్తున్నారు. కొంతమంది తరువాత మా ఆవిడ వెనకాతల నేను నిలబడి ఉన్నాము. స్వామి వారు తమ చేతితో నా భార్యను రమ్మని పిలిచారు. తను దగ్గరకు వెళ్ళగానే రెండు చేతులని పైకెత్తి ఆశీర్వదించారు. వెంటనే తనను “మీ ఇంటికి అఖిలాండేశ్వరి వచ్చింది కదా?” అని అడిగారు.

కళ్ళ నీరు కారుతుండగా నా భార్య అవునన్నట్టు తల ఊపి, స్వామి వారికి నమస్కారం చేసి నిలబడింది. స్వామివారు తనని ఆపాదమస్తకం చూసారు.

వారి మాటలు వింటున్న నేను వారి ముందు పడిపోయి, నా ఎనిమిది అంగములు నేలకు తగిలేట్టు సాష్టాంగం చేసాను. వారిని చూస్తూ నమ్స్కార ముద్రలోకి పోయిన నా చేతులు చాలా సేపు అలాగే ఉన్నాయి.

మహాస్వామి వారు మళ్ళా మా ఆవిడను పిలిచి ఆశీర్వదించి పంపారు. ఆనాటినుండి నేను పరమాచార్య స్వామి వారికి బానిసను.

అపార కరుణాసింధుం జ్ఞానదం శాంతరూపిణం
శ్రీ చంద్రశేఖర గురుం ప్రణమామి ముదావహం ।।

టెలిగ్రామ్ ఆప్ ద్వారా కంచి పరమాచార్య వైభవం పొందాలనుకునేవారు ఈ టెలిగ్రామ్ ఛానల్ కు సబ్స్క్రైబ్ అవ్వగలరు.

https://t.me/paramacharyavaibhavam

#KanchiParamacharyaVaibhavam #కంచిపరమాచార్యవైభవం ... See more